འབའ་སྲས།
མིང་རྫུན་སྙན་མོ་སྙན་མོ་འདོགས་པ་གཅིག །
གདོང་པར་མཛེས་པོ་མཛེས་པོ་འཇོག་པ་གཉིས།།
སྐད་ཆ་མཁས་པོ་མཁས་པོ་བཤད་པ་གསུམ།།
སྐད་འཕྲིན་སྤྱོད་པའི་མིའི་སྐྱོན་དང་བོ་ཡིན།།
སྡོད་ཡུལ་ས་ཆ་དྲང་བོར་མི་བཤད་གཅིག །
ལས་རིགས་བྱ་བ་མི་བཤད་གསང་བ་གཉིས།།
ཕོ་ཡིན་མོ་ཡིན་གསལ་བོ་མེད་པ་གསུམ།།
སྐད་འཕྲིན་སྤྱོད་པའི་མིའི་སྐྱོན་གཉིས་པ་ཡིན།།
སྐད་ཆ་མི་བཤད་ལྐོག་ཉན་བྱེད་པ་གཅིག །
ཆགས་སྤྱོད་བརྙན་པར་མང་དུ་བསྐུར་བ་གཉིས།།
འགུལ་རིས་སྣ་ཚོགས་ཚོད་མེད་གཏོང་བ་གསུམ།།
སྐད་འཕྲིན་སྤྱོད་པའི་མིའི་སྐྱོན་གསུམ་པ་ཡིན།།
བོད་ཡིག་མ་བསྐུར་མི་ཤེས་ཟེར་བ་གཅིག །
བོད་སྐད་རྒྱ་སྐད་བསྲེས་ནས་བཤད་པ་གཉིས།།
བོད་དོན་བཤད་ན་སྤྲོ་བ་མེད་པ་གསུམ།།
སྐད་འཕྲིན་སྤྱོད་པའི་མིའི་སྐྱོན་བཞི་བ་ཡིན།།
མ་ཉེས་ཁ་གཡོག་རྫུན་པར་བཟོ་བ་གཅིག །
སྐད་ཆ་དོན་མེད་སྒྲ་ལེན་བྱེད་པ་གཉིས།།
སྐྱག་པར་གཅིན་པར་རྒྱུད་བསྐུར་བྱེད་པ་གསུམ།།
སྐད་འཕྲིན་སྤྱོད་པའི་མིའི་སྐྱོན་ལྔ་བ་ཡིན།།
ཁུག་མ་དམར་བོ་བསྐུར་ཤོག་ཟེར་བ་གཅིག །
སྒེར་ལ་ཉ་ཉོག་མང་བ་བཤད་པ་གཉིས།།
ཁོམ་ན་ཤོག་དང་སྤྱང་རྟིག་འཕེན་ཟེར་གསུམ།།
སྐད་འཕྲིན་སྤྱོད་པའི་མིའི་སྐྱོན་དྲུག་པ་ཡིན།།
ཚོགས་པའི་ཚོགས་གཙོར་གུས་ཞབས་མེད་པ་གཅིག །
ཚོགས་མིའི་བར་ལ་མཐུན་སྒྲིལ་མི་བྱེད་གཉིས།།
ཚོགས་པའི་སྒྲིག་གཞིར་གཏོར་རླག་བྱེད་པ་གསུམ།།
སྐད་འཕྲིན་སྤྱོད་པའི་མིའི་སྐྱོན་བདུན་པ་ཡིན།།
ཉིན་མཚན་མེད་པར་ལ་གཞས་ལེན་པ་གཅིག །
བར་མཚམས་མེད་པར་འདོད་གཏམ་སྨྲ་བ་གཉིས།།
ཁ་མ་མེད་པར་ཉོག་བཤད་མང་བ་གསུམ།།
སྐད་འཕྲིན་སྤྱོད་པའི་སྐྱོན་ཆ་བརྒྱད་པ་ཡིན།།
ཆགས་རྒན་ཟེར་ནས་སྡིགས་རེས་བྱེད་པ་གཅིག །
གླེན་ཕྲུག་ཟེར་ནས་འཛིང་རེས་བྱེད་པ་གཉིས།།
ཁ་ཚུམས་ཟེར་ནས་ཉེས་བརྡ་གཏོང་བ་གསུམ།།
སྐད་འཕྲིན་སྤྱོད་པའི་མིའི་སྐྱོན་དགུ་བ་ཡིན།།
བཟའ་ཚང་ཡོད་ཀྱང་མེད་ཁུལ་བྱེད་པ་གཅིག །
གཞན་གྱི་བཟའ་ཚང་བར་ལ་འཚང་བ་གཉིས།།
རང་གཞན་གཉིས་ཀ་སྡུག་ལ་སྦྱར་བ་གསུམ།།
སྐད་འཕྲིན་སྤྱོད་པའི་མིའི་སྐྱོན་བཅུ་བ་འོ།།
15/11/13 མཚན་མོར་ལས་ཞོར་དུ།